लुम्बिनी प्रदेशका मुख्यमन्त्री डिल्ली चौधरी लुम्बिनी प्रदेश सरकारले मुक्त कमैयाहरूको बिमा गर्ने घोषणा गरेका छन ।

बर्दियाको राजापुरमा मंगलवार आयोजित २४ औं मुक्त कमैया दिवसमा आयोजित कार्यक्रममा मुख्यमन्त्री चौधरीले प्रदेशका सबै मुक्त कमैयाहरूको स्वास्थ्य बिमा गरी उपचारमा खर्च गर्न नपर्ने बनाइने घोषणा गरेका हुन ।

ADVERTISEMENT

कमैया आन्दोलनको योद्धाको नाताले देशैभरका मुक्त कमैयाका समस्या समाधान गर्न मुख्यमन्त्रीको बैठकपश्चात प्रधानमन्त्री समक्ष कुरा राख्ने उनले बताए । आफू पनि कमैयाको छोरा भएकाले मुक्त कमैयाको बाँकी पुनर्स्थापना, व्यवस्थापन र रोजगारीका बारेमा आफू सधै चिन्तित रहेको उनको भनाई छ । प्रदेशमा रहेका महिला, विपन्न लगायत लक्षित वर्गलाई रोजगारीको व्यवस्था गर्न प्रदेश सरकार लागेको बताए ।

मुक्त कमैयाहरुले भोगेको पिडा स्मरण गर्दै मुख्यमन्त्री चौधरीले ब्यवस्थापन हुन बाँकी रहेका मुक्त कमैयाहरुलाई लुम्बिनी प्रदेश सरकारले जग्गा दिएर ब्यवस्थापन गर्ने बताए । उनले भने– “जग्गा ब्यवस्थापनका लागि केन्द्र सरकार संग कुरा गर्छौ । केन्द्र सरकारले ब्यवस्थापन गर्न सकेन भने आगामी आर्थिक वर्षको वजेटमा सम्वोधन गरेर जग्गा नपाएकाहरुलाई जग्गाको ब्यवस्थापन गर्छौ ।”

वन्यजन्तु पीडितहरूलाई प्रदेश मार्फत वीमाको सुविधा सुरु भइसकेको स्मरण गराउँदै मुख्यमन्त्री चौधरीले प्रदेशका सबै जिल्लालाई जातीय कलष्टरका आधारमा विकास योजनामा लैजाने मोडल सार्वजनिक गरे । उनले स्थानीय जातिका सांस्कारिक परिकारलाई प्रवद्र्धन गर्दै उत्पादन मार्फत आयआर्जनमा जोड्न प्रदेश सरकारले योजना बनाएको बताए ।

ठाकुरद्वारालाई मल्टीकल्चर, ठाकुरद्वारा देखि मनाउ स्काई ब्रिजको कल्पना सरकारले गरेको छ । स्थानीय उत्पादनलाई प्रदेश सरकारले प्राथमिकतामा राखेर टेक्निकल सपोर्ट र कच्चा पदार्थ उपलब्ध गराएर रोजगारीको अवसर सिर्जना गर्ने विभिन्न सम्भावना रहेको मन्त्री चौधरीले बताएका छन् ।