महराद्वारा ‘बलात्कार प्रयास’ अभियोग अस्वीकार

बर्दिया टुडे
कार्तिक ४, २०७६ सोमवार
१२:३७:३० मा प्रकाशित
4.0K

SHARES

4.0K

सामान्य अभियुक्तभन्दा फरक शैलीमा हतकडीबिना आइतबार दोस्रो पटक अनुसन्धानका लागि म्याद थप गर्न सरकारी वकिलकाे कार्यालयमा पुर्यारइएका निवर्तमान सभामुख कृष्णबहादुर महराले सो कार्यालयमा सात घण्टा लामो बयान दिए । अनुसन्धानमा संलग्न प्रहरी अधिकारीका अनुसार महराले सरकारी वकिलको कार्यालयमा संसद सचिवालयकी कर्मचारी रोशनी शाहीसँग पहिलादेखिकै चिनजानका कारण उनको कोठामा आउने जाने गरे पनि बलात्कारको प्रयास भने नगरेको बयान दिएका छन् । महराले यसअघि प्रहरीसँग ‘राइट टु साइलेन्स’को अधिकार प्रयोग गरेका थिए । सरकारी वकिल कार्यालयमा भने उनले सात घण्टा लामो बयान दिएका हुन् । बयानपछि प्रहरीले महरालाई म्याद थपका लागि पुनः अदालत लगेको छ । प्रहरीले महरासँग अझै बयान बाँकी रहेको भन्दै सात दिनको म्याद अदालतसँग मागेको प्रहरीले जनाएको छ । प्रहरीले मागेको समय दिने नदिने अदालतमा भर पर्छ । म्याद थप गर्नुपर्ने कारण नदेखिए अदालतको आदेशले उनी आइतबार रिहा हुनेछन् । अदालतमा उनीमाथि अहिले म्याद थप गर्ने कि नगर्ने भन्ने विषयमा बहस भइरहेको छ । जिल्ला अदालत काठमाडौंले २८ असोजमा अनुसन्धानका लागि महरालाई थप तीन दिन थुनामा राख्न अनुमति दिएको थियो । अदालतले दिएको म्याद शनिबार नै सकिएको छ । शनिबार सार्वजनिक बिदाका दिन अदालत बन्द हुने भएकाले प्रहरीले महरालाई आइतबार म्याद थप र वयान प्रयोजनका लागि साढे ११ बजे जिल्ला सरकारी वकिल कार्यालय उपस्थित गराएको छ ।