बर्दियाका प्रमुख जिल्ला अधिकारीका चालकलाई शनिवार कोरोना पोजेटिभ देखिएसंगै  प्रमुख जिल्ला अधिकारी र उनकी पत्नीको स्वाब रिपोर्ट नेगेटिभ आएको छ ।

शनिवार बेलुका १९ जनाको स्वाव संकलन गरिएकोमा  प्रमुख जिल्ला अधिकारी लिलाधर अधिकारी र उहाँकी पत्नी सहित १९ जनाकै  रिपोर्ट नेगेटिभ आएको बाँकेका प्रमुख जिल्ला अधिकारी रामबहादुर कुरुम्वाङले जानकारी दिए ।

नेपालगंजको भेरी अस्पातालमा गरिएको स्वाब परिक्षणको रिपार्ट अनुसार शनिबार बर्दियाका प्रमुख जिल्ला अधिकारीका सवारी चालकलाई कोरोना पोजेटिभ देखिएको थियो ।

बर्दियाबाट भर्खरै मात्र मन्त्रालय सरुवा भएका प्रजिअ प्रेमलाल लामिछानेलाई पुर्याउन जाँदासँगै स्वाब परीक्षण गरिएपछि प्रजिअ लामिछानेको रिपोर्ट नेगेटिभ र चालकको रिपोर्ट पोजेटिभ आएको हो ।

प्रजिअकै सवारी चालकलाई कोरोना संक्रमण देखिएपछि जिल्ला प्रशासन कार्यालयका कर्मचारी, संचारकर्मी, सुरक्षाकर्मी र स्थानीयहरु तनाबमा थिए । भर्खरै आएका नयाँ प्रजिअ लिलाधर अधिकारीले सोही सवारी साधनको प्रयोग गर्दै आएका थिए ।

जिल्ला प्रशासन कार्यालय बर्दियाका ५५ वर्षीय सवारी चालकलाई कोरोना पोजेटिभ देखिएसंगै उहाँलाई गुलरियाको जिल्ला समन्वय समिति बर्दियाको आइसोलेसनमा राखिएको छ ।

उनले नयाँ प्रजिअ लिलाधर अधिकारी र उहाँकी पत्नीलाई काठमाडौंबाट बर्दिया ल्याएका हुन ।

शनिवार दिउँसोदेखि नै कार्यालय सिल गरी १९ जनाको पीसीआरका लागि स्वाब संकलन गरिएको थियाे ।

यसैबिच नयाँ प्रमुख जिल्ला अधिकारी लिलाधर अधिकारी बर्दिया आइसकेपछि शुक्रबार आयोजना गरिएको पत्रकार परिचयात्मक कार्यक्रममा पुगेका बर्दियाका पत्रकारहरु पनि शसंकित छन् ।

कार्यक्रममा सहभागी पत्रकारहरुको स्वाबको नमुना लिई तत्काल परीक्षणको व्यवस्था गर्नुपर्ने नेपाल पत्रकार महासंघ बर्दियाका अध्यक्ष राजेन्द्रप्रसाद धितालको माग छ । महामारीका बेला सजग र संयमित भएर कार्यक्षेत्रमा काम गर्न सम्पूर्ण पत्रकारहरुलाई अध्यक्ष धितालले अनुरोध गरेका छन् ।